《靈‧肉》
第1場 外 森林/河邊 黃昏/黑夜
△ 數百名士兵在森林外混戰。
△ 夕陽染紅了戰場。
△ 張釗一方逐漸敗退,張釗向森林逃走,後有4名追兵追殺張釗。
△ 入夜,天色轉黑。
△ 追趕至急流河邊,張釗停下,追兵排出半月形陣式包圍張釗。
追兵甲 : (大叫) 呢個人頭喺我嘅!
△ 士兵甲迅即提刀向張釗斬過去,張釗避過後還了一刀,士兵甲倒地。
眾追兵 : (提刀,大叫) 上啊!
△ 一眾追兵向張釗衝了過去。
△ 張釗邊退邊戰,砍傷2名追兵後,被另一名追兵砍傷背部,十分痛苦。張釗奮起還以顏色。
△ 受傷的2名士兵重新向張釗逼近,張釗繼續向後退,退至急流邊絆倒跌入河中,被水沖走。
第2場 外 河邊 早上
△ 李晴提著水桶和衣服到河邊洗衣服。
△ 洗衣時,李晴發現不遠處張釗臥在河邊,不醒人事。
△ 李晴放下衣物,小心翼翼地走向張釗旁,檢查一下張釗還有無呼吸。
△ 李晴猶豫不決是否救起張釗。
△ 正當李晴想轉身離開時,李晴又回望了張釗一眼停了下來。
△ 最終李晴決定救起張釗,帶他回家治療。
第3場 內 李晴家 接第2場 早上
△ 李晴攙扶著受傷的張釗在門外呼叫。
李晴 : (大叫) 爹!爹!開門啊!
△ 李浩行去開門。
李浩 : (未開門,疑惑) 咁快洗完衫返嚟嘅?(打開門,驚訝) 做咩事啊?做咩會帶咗個
傷者返嚟架?
△ 李晴趕緊將張釗背向上的攤放在床上。
李浩 :喂喂喂!你唔喺諗住收留佢、醫返佢呀嘛? (李晴去準備藥物,李浩抓住李晴手)
我地自己都顧唔掂自己,你仲諗住救佢?佢咁傷,救返都晒米糧啦!停啊!停
啊!
李晴 :佢只喺受左刀傷同一啲瘀傷,只要好好治理就無事架啦。
△ 李晴不理李浩阻住,一心準備醫療物品;李浩則從旁阻撓。情況不斷維持。
李晴 :爹!你唔好阻住我救人啦!你真喺忍心見死不救咩?
李浩 :我唔忍心見死不救。但我更加唔忍心見到自己餓死無得救,而救咗個不明來歷嘅
陌生人!
李晴 :爹,你自小教我做人要有惻隱之心架!我地點可以為咗少少溫飽,而放棄救一個
可以救到既人呢?
李浩 : (嘆氣) 唉!今時又點同往日呢……時移勢易,依家唔好講話三餐,兩餐都不得
溫飽,點去照顧多一個不明來歷嘅負累呢……?
李晴 : (準備好了用品) 爹!總之人我一定要救!至於三餐溫飽……你唔好阻住我,幫
手洗乾淨啲衫同收返嚟仲好啦!我留咗喺河邊仲未洗……
△ 李晴為張釗清理傷口。
李浩 : (嘆息,搖頭) 唉……生女,生女,生女有咩用?
△ 李浩拿了農具出去。
第4場 內 李晴家 晚上
△ 李晴和李浩準備食晚飯。桌上只有一碟青菜和稀飯。
李浩 : 你睇吓!我地自己都食唔好,點照顧多一個人?
△ 李晴沒理會李浩,拿著粥水到張釗床旁,餵他進食。
△ 張釗緩緩醒來。
李晴 : (高興) 爹!佢醒啦!
△ 李浩放下碗筷行了過來望。
△ 張釗眼睛依然未完全睜開,意識迷糊。靠李晴把他扶起床來。
李晴 :來,小心啲,慢慢來。(吹粥) 食啲粥,慢慢張開口,小心熱。
李浩 :好返就好啦!快啲好返走啦,我呢到無咁多閒米養個閒人。
△ 李晴繼續餵張釗進食;李浩回飯桌食飯。
第5場 外 田 早上
△ 李晴李浩在田裡工作。
△ 張釗從屋內出來,感覺到陽光的刺眼,看見李晴和李浩在田裡工作。
△ 李晴看見張釗,放下手上的工作,跑到張釗前。
△ 李浩看見,感到不滿。
△ 有中年3個村民路過看見,於是向李浩問起。
袁光 : 浩伯,個個男嘅未見過嘅,喺你新女婿嚟啊?
李浩 : (怒) 佢妄想!佢只喺隻蛀米蟲嚟!
陸信 : 早幾日有人見到你個女喺河邊救起左個受傷嘅男人,睇怕應該係佢啦。
吳東 : 睇嚟浩伯屋企收埋唔少米喎,仲可以養多個人,咁好心。
李浩 : 別再提了,過幾天村長就會嚟收稅……唉,以往朝廷一年一次徵稅,依家軍閥
割據,鍾意幾次收就幾時收,鍾意收幾多就收幾多,我地老百姓嘅日子難捱
啊……
陸信 : 講起軍閥,你地屋企救返個個人好似係士兵嚟……會唔會有啲咩事架?你知啦,
如果佢係敵對軍閥嘅士兵,你地收留佢你地就係內奸,我地知情不報都喺同
犯……!
△ 袁光,吳東起哄。
李浩 : (堅決) 無啲咁嘅事!一定喺搞錯!佢只係失足受傷遇溺,普通人一個,無其他
嘢!
陸信 : 你話無就無啦,不過我覺得佢始終來歷不明,都喺小心啲好!免得惹上啲咩禍
啦……呢個年頭,要平平安安過活都已經唔易架啦……
袁光 : 走吧,仲有好多工作等緊我地去做!浩伯你自己小心啲啦!
△ 李浩望著遠處的張釗和李晴,十分不滿。
第6場 內 李晴家 晚上
△ 李晴正準備晚飯。
△ 李浩不滿地望住張釗。
△ 李晴把飯菜拿過來,並叫張釗過來一起食飯。
李晴 :釗大哥,過來一齊食飯啊。
張釗 : (吞吐) …… (望向李浩) 有心啦……我諗唔喺幾好……
李浩 :我地屋企啲米只夠養2個人,無多餘米糧養多一個閒人!妳今晚仲要煮咗舊
肉……
△ 張釗對著李晴無奈地笑了一下。
李晴 :釗大哥啱啱先醒返,身上仲有傷,既然我救咗佢,我就有責任照顧埋佢,等佢康
復!食肉對釗大哥嘅傷好。
李浩 :呢個人來歷不明,妳都應該清楚,佢喺士兵,更加喺逃兵!依家各地軍閥互相爭
鬥,如果比上面知道我地收留其他軍閥既士兵,妳知道我地會點嗎?唔講遠嘅,
依家徵稅嚴苛,以往一年交一次,依家幾乎每季都要交一次,過幾天村長就會過
嚟收稅,我地自身都難保,點養多個白食米既人?
張釗 :對唔住……多謝李姑娘嘅相救!但我真喺唔應該再打擾你地……我可以照顧到自
己,我就此告別啦!
△ 張釗向門口走;李晴走上前欲攔阻。
李晴 : (拉住張釗) 釗大哥,你都未好返……你一個人點得……?
張釗 :李姑娘,多謝妳嘅好意!但我實在唔應該再打擾妳地…… (大動作,甩開李晴拉
住的手) (痛苦)啊!
△ 張釗動傷了背部;李晴從旁攙扶。
李晴 :你睇!你都未好返,你叫我點忍心比你自己一個流離失所……? (望向李浩撒
嬌) 爹! (李浩沒理) 爹! (李浩不理再撒嬌點) 爹!
李浩 :飯菜都凍啦……坐低食飯啦……
李晴 : (開心) 爹!我知你唔喺咁鐵石心腸嘅!
△ 扶張釗到飯桌。
第7場 外 李晴家外 接第6場 晚上
△ 張釗走在李晴家外看天。
△ 李晴從屋內出來。
李晴 :釗大哥,做咩一個人坐起到?你身體仲未好返,小心著涼……
張釗 :嗯……有心。我……喺到諗,呢種平靜嘅生活,可以維持到幾耐?
李晴 :釗大哥,如果你想嘅……可以一直留喺村到架!其實村入面嘅人都好好人,一定
無問題架!
張釗 :多謝李姑娘嘅好意!只可惜我明白自己嘅處境,我實在不便打擾。
李晴 :我啊爹嘅事? (笑) 其實佢只喺口硬心軟,佢喺好人嚟!(打量著) 嗯……或者等
你好返,你咪可以落田幫佢手?又或者上山打獵之類。只要填飽到佢個肚,佢就
唔會有怨言架啦。(微笑)
張釗 :李姑娘妳真喺好人!
李晴 :唔好姑娘前姑娘後叫我啦……嗯……叫我晴兒啦!大家都喺咁叫我!
張釗 :嗯,晴兒。
△ 二人微笑。
△ 李浩從屋內出來。
李浩 : (裝咳暗示) 咳!咳!晴兒,入屋啦。
李晴 :……嗯 (入屋)
△ 待李晴入屋後,李浩走近張釗。
李浩 :我女天生善良,不懂猜度人心。我一副老骨頭,就得呢一個女……我唔會比人欺
負佢! (怒視張釗) 希望你好自為之!
張釗 :李伯多心啦,我只喺個想過返啲和平日子嘅平凡人……
△ 李浩轉身入屋。
△ 張釗待李浩轉身後,表情稍稍表露不屑。
第8場 外 田 午
△ 村長騎著馬,帶著數兩木頭車和十多名隨從過來。
△ 李浩停下手上的工作。
李浩 :要來嘅始終要來……
△ 李浩放下農具,過去迎接村長。
李浩 :村長你好啊,太陽咁曬都仲要麻煩村長你親自過來收稅,真喺唔好意思!
村長 :得啦得啦,浩伯無謂寒暄啦,我好忙,稅收喺邊?
李浩 :喺嘅,請你跟我過來倉庫呢邊。
△ 李浩帶路。
張釗 :晴兒,佢就喺村長?
李晴 :嗯……
張釗 :但喺區區村長,點解會有咁多衛兵嘅?
李晴 :呢層我都唔清楚,只不過聽聞軍閥嘅官員同村長互相勾結,從中上下其手,又比
村長組織咗一班衛兵來控制我地,總之我地無人敢反抗佢啦……
徐剛 :晴兒!
△ 徐剛從遠處大叫,向李晴跑過去。
張釗 :佢喺?
李晴 :村長個仔,徐剛。
△ 徐剛跑到過來。
徐剛 : (帶點喘氣) 晴兒,別來無恙啊嘛?無見一段日子,妳又動人咗!
△ 李晴敷衍地笑了一笑。
徐剛 : (望一望張釗) 呢個人喺?
張釗 :在下張釗。
徐剛 :晴兒,遲啲城有燈會,不如我地一齊去啊?
李晴 :唔好意思,你邀請第二個啦,我無興趣。
徐剛 :咁不如我地一齊去泛舟?
李晴 : (不耐煩) 無時間,亦都無興趣。
徐剛 :咁不如……
△ 隨從從遠處大叫,打斷徐剛對話。
隨從甲 : (大叫) 大公子!要走啦!
徐剛 : (大叫回應) 喺!(向李晴) 唔好意思,我要走啦……我有空再過來搵妳啦,再見!
△ 徐剛轉身離開。
張釗 :睇來佢對妳有意思。
李晴 :不過我對佢無好感呢!
第9場 外 田 午
(Montage)
△ 夏日。
△ 蟬鳴。
△ 一班小朋友玩樂。
△ 河水。
△ 張釗在田裡幫忙,汗流浹背。
李晴 :釗大哥,飲啲水先啦。(給水壺)
張釗 :唔該晴兒。
李晴 :今年夏天嘅天氣唔錯,再加上釗大哥嘅幫忙,相信我地今年嘅收成一定可以好好!
張釗 : (飲水) 嗯。
△ 張釗望到遠處徐剛和一個小朋友經過,往上山的路行。
張釗 : (指著徐剛方向) 嗰個咪徐剛?佢隔離個小朋友喺?
李晴 :嗰個喺徐剛嘅弟弟,叫徐福。徐剛好疼愛佢弟弟,經常帶佢2個人周圍去玩。
第10場 外 河邊 大雨
△ 傾盆大雨。
△ 張釗,李浩和一眾村民在河邊幫忙築堤。
△ 村長在旁邊指揮。
村長 : (指向左邊) 左邊要加多啲沙包!
李浩 : (不憤) 早幾日仲藍天白雲,仲諗住今年夏天天氣會好,有好收成……點知連日
大雨,農作物都浸死晒,聽聞附近幾條村都已經浸左,洪水遲早會過到來……
唉……
陸信 :唉……我唔敢諗咁遠啦……我叫賤內做好準備,希望將損失減到最少啦……
吳東 :水一到,田就肯定無架啦,屋都未必保得住……唯有盡量保住糧食同性命!
袁光 :我地啲賤民就只可以聽天由命……嗰啲有權有勢嘅人就可以指手畫腳,貪得多,
住得高,唔使怕水災。哼!命啊……
△ 哨兵敲響銅鑼。
哨兵 : (大叫) 喂!洪水來啦!走啊!走啊!
△ 眾人立即離開。
眾村民 : (大叫傳話) 走啊!走啊!洪水來啦!
△ 洪水勢猛,不斷湧向村莊。
△ 洪水沖毀河堤。
第11場 外 村 陰
(Montage)
△ 浸毀的農田。
△ 魚在泥地的水沱中掙扎。
△ 一間木屋倒塌。
△ 張釗修補屋舍;李晴清理積水。
李浩 : (傷心) 無啦,無啦,今次咩都無啦!(跪在地上) 天啊!點解要咁玩我地?
李晴 :爹……(扶起李浩)
△ 一班村民集結,討論災情。
△ 陸信在人群中間。
陸信 :今次水災大家都損失慘重,興幸嘅喺無咩死傷……
袁光 :依家最怕嘅喺我地嘅糧食同秋天要交嘅稅……
△ 眾人認同。
吳東 :但恐怕今年嘅稅收一樣要交……
陸信 :怕只怕稅收又加……
△ 眾人驚訝。
村民甲 :唔喺掛?仲要加?
村民乙 :我地啲田都已經浸爛晒,我地自己連食都唔夠食啦,仲點交?
陸信 :上面要打杖,中間要貪贓,我地條命算喺咩?就算要加,恐怕我地都只有吞聲忍
氣,無得反抗……!
△ 眾人起哄,爭論。
第12場 內 村長房 陰
△ 村長家在一個小山丘上,沒有受到多大的水災影響。
△ 村長在房間看軍閥寄來的信,憤怒把信擲在桌上。
村長 : (憤怒) 平時我上繳稅嘅時候,就好聲好氣。依家我求佢地幫我少少忙,唔好增
加今年嘅稅收,一個二個就諸多推搪!枉我幫咗佢地咁多!
徐剛 : 爹,其實我唔明點解你要幫啲村民寫信比軍閥,幫班村民?
村長 : 剛兒,你知道民反最基本嘅原因喺咩嗎?喺飢餓!人民只會喺飢餓到走投無頭
先會作反。我地已經一年收兩次稅,仲要每次都不斷加稅。今年水災,所有嘅
農田都浸爛晒,連帶村民嘅儲備米糧都損失慘重。如果秋天仲要徵收更多嘅稅,
到時班村民就唔知會做咩架啦……但至少我知道,同軍閥勾結嘅我地,一定喺
最先出事嘅人!做人要學識保障自己利益。(拍徐剛肩)
徐剛 : 爹所言甚是!孩兒又長知識啦。
△ 馬真在外面敲門
村長 : 邊個?
馬真 : 馬真。
村長 : 入來。
△ 馬真入房。
村長 :所為何事?
馬真 :有個叫陳九嘅村民想見村長,話有重要事相談。
村長 : (不耐煩) 同佢講我好多事忙緊,唔得閒,叫佢遲啲先搵我啦!
馬真 :我已經試過用藉口趕佢走。但佢叫我傳話件事係關於水災同兩位公子,希望村長
細心考慮,否則後果自負。
△ 徐剛臉有難色。
村長 : (怒) 豈有此理!居然敢要脅、恐嚇我?我就睇下佢有咩要講!叫佢入來!
馬真 :喺!
△ 馬真出房。
△ 村長看見徐剛的異樣。
第13場 內 村長房 接12場
△ 馬真帶陳九到村長房。
馬真 :陳九帶到。
△ 陳九望了馬真和徐剛一眼。
△ 徐剛迴避陳九眼神。
△ 村長示意馬真出去。
△ 馬真出房並把房門關上。
△ 村長行到房門位置,確認多次房門是否完全關上。
村長 :你就喺陳九?(陳九點頭) 既然你話件事同剛兒有關,我就留佢喺到聽下你有咩
要講?
陳九 :既然村長唔介意徐大公子在場,咁就更好,可以當面對質,無謂話我捏造事實。
我亦都無謂轉彎抹角,水災一事其實喺由徐大公子同徐二公子所引起!
村長 : (震驚,大聲反問) 你亂講啲乜野?水災乃天災,關我兩個兒子咩事?
陳九 :請村長冷靜一下先。水災當然喺天災,之但喺引起天神憤怒嘅正正喺村長嘅兩位
公子!未知村長記得兩位公子早前曾到山上遊玩一事嘛?
村長 :又如何?
陳九 :眾所周知,山上有供奉天神嘅神像,我們向來十分尊重天神而不敢接近打擾。當
日我路經廟宇,睇見兩位公子在附近遊玩,二公子更玩得忘形。我原本諗住就此
離開,但點知喺離開之前聽到好大聲、破碎嘅聲音,於是我就返轉頭睇下。睇見
廟內嘅天神像跌落喺地,仲碎裂晒。好明顯喺兩位公子所為,惹怒天神,所以上
天為咗懲罰我地,所以先會有呢場大雨水災。
村長 : (望向徐剛) 剛兒,真有此事?
△ 徐剛低頭,不敢回答。
△ 陳九暗地偷笑。
村長 :我明白啦。咁你想點?
陳九 :村長果然喺明白事理嘅人,我只喺個生意人,只識談生意嘅事,未知村長有無興
趣做一場買賣?
村長 : (笑了笑) 我都好喜歡做買賣。
第14場 內 村長房 接13場
△ 村長和陳九從房內出來。
△ 二人臉帶微笑。
陳九 :咁我就等待村長嘅好消息啦!告辭。
村長 :當然!當然!告辭。
△ 陳九離開。
村長 :馬真,入來。
△ 村長和馬真入房,關門。
村長 :馬真有件事要委託比你。
馬真 :喺!請村長吩咐!
△ 村長在馬真耳邊交代事情。
馬真 :喺!無問題!在下立即去辦!
△ 馬真出房。
徐剛 : (跪低) 爹,真喺好對唔住!孩兒知錯!
村長 : (扶起徐剛) 起身先。放心,已經無事啦。
徐剛 :多謝啊爹。但我唔明點解啊爹要忌諱陳九?佢無證無據,憑咩叫人信佢?
村長 :喺呢種時勢最忌流言蜚語!頭先陳九講一句你已經露出馬腳,如果比班村民審
你,恐怕你已經……記住!做事要深藏不露,保住自己利益先喺最重要!
徐剛 :喺孩兒知道!
第15場 外 森林 昏 陰
△ 陳九高興地在森林行。
△ 馬真騎著馬追出來。
△ 陳九聽到聲音,停下回頭看。
馬真 : 陳老闆!我家老爺有重要事漏了交代,請留步!
△ 陳九等待馬真。
△ 馬真停馬,拿出袋子,作狀要交到陳九手上。
馬真 : 老爺要我將呢個袋交比陳老闆,但事關緊要,老爺無交代喺咩。
陳九 : 咁奇怪?
△ 馬真突然打開袋子,從袋子抽出小刀,直插陳九心臟。
陳九 : 嗚……
△ 陳九意欲掙扎,馬真把刀插得更深,陳九無力反抗。
馬真 : 老爺忘記咗交代你,做人要小心行事!
△ 馬真在陳九頸上再割了一刀,並再次確認陳九是否斷氣。
第16場 外/內 村/李浩家 日/昏
△ 張釗上山打獵回來,被村民怒目而視。
△ 村民間各自竊竊細語。
△ 黃昏,張釗回到李浩家,入內。
張釗 :今日收獲唔錯啊!
△ 李浩不屑張釗。
張釗 : (細聲問李晴) 發生咗咩事?
△ 李晴拉張釗出屋外。
李晴 :……
△ 李晴吞吞吐吐,張釗心急。
張釗 :究竟發生咗咩事?做咩吞吞吐吐咁?晴兒,有咩事即管同我講啦!
李晴 : (吞吐) 最近,村入面有傳言……話今次天災……喺因為……
張釗 : (心急) 因為咩嘢啊?
李晴 :你……
張釗 : (驚訝) 我?關我咩事啊?(苦笑)
李晴 :佢地話我地呢到呢幾年來相安無事,而你一來之後,就發生咗天災,仲有人傳言
你以前喺士兵嘅事,認為你喺不祥人! (傷心)
張釗 :點會咁架……?咁嘅說話居然都有人相信!
李晴 :外面傳言傳得好厲害,佢地今日過來要我地趕你走,一喺就我地都要走……咁啊
爹佢……
張釗 :得啦,我明白啦,你啊爹當然喺選擇捨棄我啦……(李晴點頭) 嗯,我會走架啦!
麻煩咗你地咁多,我都喺時候要走……
李晴 :釗大哥……
張釗 :晴兒……
△ 張釗轉身想回屋。
李晴 :啊!釗大哥,不如你搬去山上面住啊?咁咪可以達到佢地嘅要求,我地又可以唔
使分開……
張釗 :晴兒……
△ 張釗攬住李晴。臉露憤怒。
第17場 內 李浩家 日
△ 李浩身體轉差,生病。
△ 李晴忙於照顧李浩。
△ 李浩咳。
△ 李晴拿水走到李浩床邊給他喝。
李晴 :爹,飲啖水先。覺得點啊?
李浩 :人老咗,自然多病……唉…… (咳)
李晴 : (憂心) 爹仲後生,呢啲小病好快會好返架啦!爹你休息下先啦!
李浩 :我自己知自己事……久病難癒啊……
△ 村長帶了手下在外敲門。
△ 李晴去開門。
李晴 :村長……真喺唔好意思!又要你過來收稅……
村長 :小事,浩伯身體如何?
李晴 :依然抱恙未能下床……
村長 :剛兒,你去跟晴兒收稅,我想探望下浩伯。(打眼色)
徐剛 : (微笑) 孩兒知道。晴兒請。
李晴 : (向村長) 咁家父就有勞村長啦。(向徐剛) 大公子,呢邊請。
△ 村長入屋,走到浩伯床邊。
村長 :浩伯,你身體如何啊?
李浩 : (咳) 年紀大,恐怕……
村長 : (打斷李浩說話) 哎,浩伯唔好咁講,你吉人自有天相!不過,生死有命,今日
唔知聽日事,我地都好應該為將來打算下!
△ 李浩認同。
村長 :村入面個個都知李浩最疼愛自己女兒,而晴兒亦都十分孝順,於是到依家都仲未
嫁人……但浩伯同晴兒你地嘅年紀都唔細啦,總要踏入人生嘅另一階段,而我剛
兒亦然。我家剛兒向來傾慕你家晴兒,於是我就諗我地有無可能成為親家呢?
李浩 :盛蒙村長同大公子錯愛!我只得呢一粒女,雖然我好希望佢嫁戶好人家,但我都
希望尊重佢嘅意願……希望村長可以比啲時間我問下佢意見。
村長 :咁就有勞浩伯啦,在下就靜候佳音啦!
第18場 內 李浩家 夜
△ 李晴準備晚飯。
李晴 : 爹,晚飯準備好啦。
△ 李晴扶李浩起床。
△ 李晴,李浩進食。
李浩 : 晴兒,妳今年幾大啊?
李晴 ; 二十有一……做咩咁問啊?
李浩 : 妳年紀都唔細啦……因為我嘅關係,妳到依家都未嫁……
李晴 :爹,你做咩咁講啊?我願意一世陪住啊爹你!
李浩 :爹老啦,日子難過,今日交埋稅後,我地嘅米缸已經見底……長此下去都唔喺辦
法……爹只希望妳可以早日嫁人搵戶好人家,完我心願,免我憂心……(裝咳)
△ 李晴想起張釗,心裡誤會李浩講的對象是張釗,暗自歡笑。
李浩 :今日,村長過來同我提親。佢希望大公子能夠同妳成親,徐李兩家締結姻親。晴
兒,妳願意嗎?
李晴 : (驚訝) 吓?……我……
李浩 :我知道妳私底下仲有同張釗聯絡,但妳同佢無可能架,佢唔會比到幸福妳……(咳)
李晴 :爹……我……
李浩 :妳真喺咁唔願意嗎?
李晴 : (點頭) 嗯……
李浩 :咁算啦……妳當我無問過啦……我都唔想勉強妳……(失望) (咳)
第19場 外 村 昏
(Montage)
△ 炎熱刺眼的太陽。
△ 乾涸的農田。
△ 枯死的樹木。
△ 沒穿上衣的村民,身形瘦削,缺水,動作緩慢地走動。
△ 李浩衰老地睡在床上。
△ 枯竭的河流,僅有少量的水。
△ 李晴身體乏力地提著半桶水。
△ 幾個村民提著空的水桶往李晴的相反方向走。
△ 李晴感到炎熱疲倦,頭暈。
△ 李晴不小心絆倒石頭,把水倒掉。
△ 李晴十分傷心。
第20場 內 李浩家 昏/夜
△ 黃昏,李晴提著少量的水回到家。
李晴 : (沒氣力) 爹,我回來啦……
△ 李浩咳。
李晴 :我依家去煮晚飯……
△ 晚,李晴拿著很稀的粥水給李浩。
李晴 :爹,起身食飯啦……
李浩 :晴兒,我地屋企仲剩幾多米?(咳)
△ 李晴靜默不答。
李浩 :晴兒,妳消瘦咗好多……(咳) 再喺咁落去唔喺辦法架……(咳)
李晴 : (說謊) 爹,你放心啦,屋企仲有米啊!
李浩 :妳估我依家再同村長講以前提親一事仲有無可能?雖然我當時拒絕咗佢地,妳又
變成咁樣,但大公子到依家都仲未成親,應該仲有可能……(咳)
李晴 :爹,唔好再講啦!節省啲體力會好啲……
△ 李晴繼續餵李浩食粥。
第21場 內 村長家 日
△ 村長和軍閥的手下談判。
村長 :馮大人,相信你都知近年水災、旱災接連發生,我地村已經兩年無正常收成……
但就每年兩次徵稅,每次都加稅,村民已經受唔住……
馮大人 :呢啲喺你嘅問題啊!我只喺負責收稅,至於收幾多稅、點樣交稅?呢啲問題喺你
地嘅問題。(視察村長家) 不過,我相信村長你有足夠嘅能力幫佢地度過難關嘅,
問題喺你出唔出手啫?(微笑)
△ 村長沉默不語。
馮大人 :好啦,我都要告辭啦!你好自為之啦。
第22場 外 村 日
△ 一名道士經過村莊,為村莊占卜,派發符咒。
△ 村民看見,紛紛相擁而至。
道士 : (手指計算) 嗯,我已經明白你地村發生咩事。
眾村民 :咁究竟喺咩事?
道士 :本來你地條村就風調雨順,只可惜得罪天神,於是上天就用天災來懲罰你地!
吳東 :吓?我地幾時有得罪天神?
道士 :我路經此地,睇見你地山上面嘅廟宇日久失修,咁已經喺對天神嘅不敬啊!
袁光 :咁我地應該點做先可以化解?
道士 :要化解就要祭天。
陸信 :祭天?
道士 :無錯!首先要準備祭品上供天神,然後要為天神重建廟宇同重鑄神像。
袁光 :我地依家咁樣仲邊有多餘嘅能力上供祭品……?
道士 :此言差矣!如果你地再唔求上天原諒,恐怕你地將會有更大嘅劫!到時恐怕你地
成條村都性命難保!信不信由你地,貧道已經盡咗力勸說你地……
△ 道士意欲離開。
△ 吳東與陸信拉住道士。
吳東 :道長請留步!請道長為我地作法。
△ 道士微笑答應。
陸信 :請問道長,我地要上供咩祭品?
道士 :首先六畜、金銀玉帛必不可少,其次最重要嘅係需要一名純潔女性作為「用人」,以祭天神。
眾村民 :「用人」?
道士 :無錯!相信大家都應該有聽過「河伯娶妻」一事,要祭祀水神、河神,一般以女
性作為祭品會較易得到天神嘅歡心。而且,你地都應該上供唔到幾多六畜、金銀
玉帛……咁嘅情況更應該揀一個相貌姣好、純潔年輕嘅女性作為「用人」。
△ 眾村民議論紛紛。
道士 :不如咁樣,貧道會留喺到幾日,你地商量好再搵貧道。貧道先行告辭。
△ 道士離去。
袁光 :我地真喺要用活人做祭品?
吳東 :事到如今,我覺得一試無妨……再喺咁落去,我地都會餓死!
陸信 :咁我地應該揀邊個做供品至啱……?
第23場 內 村長房 日
△ 馬真在村長房門外敲門。村長允許馬真進內。
馬真 :村長,我有一事希望你能夠相助……
村長 :喺關於你女兒嘅事?
馬真 :村長果然料事如神……正是此事……
△ 村長沒有說話,等待馬真提出交易。
馬真 :我只有珍兒一個女!我由佢自細開始就悉心栽培,到依家十六歲亭亭玉立,正想
幫佢搵戶好人家締結良緣。點知遇著今次祭祀一事……村民對用珍兒做「用人」
嘅呼聲好高……我好擔心佢會就咁離我而去……我得佢一粒女……
村長 :我好明白你為人父親嘅心情……只可惜呢啲喺咁多位村民嘅決定,我都做唔到啲
咩……
馬真 :村長,做祭品需要嘅喺純潔嘅女性,如果我珍兒可以同大公子成親,咁珍兒就可
以避過挑選,而我地兩家亦可以建立更緊密嘅信賴關係……
村長 :馬真啊馬真啊……你還記得上年陳九一事嗎?
馬真 :村長,我馬真發誓,一定為你躹躬盡瘁,死而後已!
村長 : (笑) 放心!你一向喺我嘅左右手,最幫得我。而珍兒亦都喺一位好適合嘅媳婦。
其實我一直有意撮合剛兒同珍兒,以後就更加有勞馬姻家嘅幫忙啦!
馬真 : (歡喜) 喺!但至於祭品人選方面……
△ 村長狡猾地笑了一下。
第24場 內 李浩家 晚
△ 李浩獨自留在家。
△ 村長帶同手下到訪。
李浩 : 村長……(咳)
村長 : 浩伯不必多禮!(扶浩伯回床休息) 浩伯身體如何啊?
李浩 : 咳……咳……恐怕事日無多啦……咳……咳……
村長 : 浩伯點可以咁悲觀?其實呢啲只喺小病,只要食返多啲嘢就無事架啦。
李浩 : (苦笑) 哈哈!連粥水都食唔起,談何食得好啲?
村長 : 其實,機會嘅嘢只喺睇你去唔去把握。依家竟有一個機會比你啦浩伯!
△ 李浩不解。
村長 : 雖然浩伯行動不便,但我相信你都應該聽過村最近要搞祭祀嘅事吧?
李浩 : 略有耳聞……
村長 : 咁我諗浩伯一定知道祭品當中有一樣叫「用人」嘅祭品吧……?
李浩 : (驚,激動) 莫非村長你喺要我晴兒?咳!咳!
村長 : 浩伯唔好激動住!我知道要你交個女出來喺一件好痛苦嘅事……所以我唔喺真喺
要你交晴兒出來,我地只不過做一場戲……假裝將晴兒作祭品,實則我地偷龍轉
鳳,做一場戲比村民睇。事成之後,我會安排你同晴兒去城鎮居住,為你治病。
到時浩伯你嘅病一定可以藥到病除!
李浩 : 之但喺……
村長 : 但喺啲乜?祭祀天神呢啲本來就唔可信!只不過一班村民迷信鬼神之說,我身為
村長嘅只好順勢附和……而村入面為咗用邊個姑娘做供品而爭論不休,為咗平息
呢件事,我亦只好插手。而我同浩伯你一向交情甚深,我更加不忍心見到你頑疾
纏身,今次喺一個好機會一石二鳥啊!我諗你都唔想晴兒陪你受苦吧?
△ 李浩沉思考慮。
△ 村長命人拿了一塊肉過來,在李浩面前。
△ 李浩看見肉忍不住吞口水。
村長 : 浩伯你睇!呢舊肉就擺喺你面前,要唔要只喺你伸不伸手之間。
△ 李浩吞口水。
李浩 : (伸手拿肉) 肉……肉……
村長 : 放心!只要你應承我,來緊仲有更多嘅肉比你同晴兒!(將肉交到李浩手)(奸笑)
第25場 外 山上 接第24場 晚
△ 張釗和李晴在森林裡見面。
李晴 : 最近啊爹嘅身體又變差咗……
張釗 : 好對唔住……最近山入面嘅獵物都變得好少,再加上到山上打獵嘅人比以前更
多……
李晴 : 嗯,我都明白!之但喺爹已經好耐無食過肉,身體一日比一日差,我怕佢會捱
唔住……
張釗 : 嗯!我聽日試下再行多幾個山頭,睇下可唔可以有收獲,然後送去比妳!
李晴 : (感激) 多謝釗大哥!
張釗 : 晴兒,妳都消瘦咗好多……妳都應該好耐無食過肉,妳唔可以只掛住阿爹而唔
理自己啊……
李晴 : 我……我無事架,仲可以支持住……
張釗 : 喺啦,聽講村入面來咗個道士,好似要搞祭祀?
李晴 : 喺……依家村入面為咗女性活人祭品嘅事而爭論不休……
張釗 : 咁你?
李晴 : (搖頭) 我無事。大家主要都喺推舉村長手下馬真嘅女兒馬珍。只不過礙於佢喺
村長嘅手下,仲未敢交涉。
△ 月光從雲層露出,照射二人。
李晴 : 時候都唔早啦!啊爹仲等緊我照顧,我要走啦!
張釗 : 咁我地聽日再見啦!我會盡力搵到肉比你啊爹!
李晴 : 嗯!
△ 李晴轉身離開。
第26場 內 李晴家 晚
△ 李晴回到家門前。李浩和村長眾人在家內等候李晴。
△ 李晴開門進屋,立即被眾人捉住。李晴反抗,不果。
李晴 :做咩啊?放開我啊!(不斷掙扎)
第27場 內 某屋 接第26場 晚
△ 李晴被緊綁在木頭上,口被布塞住,苦苦掙扎。
△ 屋外有2名守衛看守。
△ 李浩由村長扶著帶進屋內。李晴更大力掙扎。
△ 李浩坐下,村長命人拿走塞住李晴口的布。
村長 :李晴,妳冷靜一下,同浩伯好好傾下。
△ 村長和手下到屋外等候。
李浩 :晴兒……
李晴 :爹……究竟發生咩事?救我啊……
李浩 :晴兒,妳冷靜先。爹一定會救妳,唔會比妳有事!放心,無事架!
△ 李晴冷靜下來。
李浩 :晴兒,妳都知道最近村要「人」……所以……
李晴 :所以選了我,要我犧牲?
李浩 :唔會唔會!唔會犧牲架!村長答應過我,會從中做手腳,救返妳出來,祭祀儀式
只喺做比班村民睇,唔會真喺要你犧牲架!村長仲答應我,只要後日事成之後,
就會送我地去城入面住,提供金錢同食物比我地,村長岩岩仲比咗舊肉我食,我
身體即刻好返好多……
李晴 :……原來你唔喺被逼……(苦笑)
李浩 :晴兒啊,我都喺無辦法先……妳諗下,既然只喺做一場戲,而我地又可以過返正
常既生活,何樂而不為?
李晴 :爹……試問世上邊有咁便宜既事?村長出咗名貪錢、自私,佢只喺利用我地,欺
騙我地,佢背後一定有陰謀!更何況,村民相信住祭祀一事,我地點可以欺騙
佢地?
李浩 :呢啲都只喺妳既推測,事實喺村長將一舊結結實實既肉擺喺我面前!
△ 李浩拿出一舊被布包住的熟肉。
李浩 :妳睇!(將熟肉遞到李晴眼前) (吞口水) 我專登留比妳!妳聞下幾香,妳睇下啲肉
幾新鮮!只要我地做好呢場戲就可以有更多更多呢啲肉!以後唔使再捱肚餓!
(愈遞愈近李晴)
△ 李晴無言以對,不禁吞口水,欲欲想食,但內心仍在掙扎。
李浩 : 晴兒,肚餓嗎?我專登留比妳……我知道妳為咗我付出咗好多……來啊,等爹
今次為妳做番少少嘢。
△ 李浩用手撕出一小塊肉片比李晴,遞向李晴嘴邊。
李浩 :晴兒,食吧!
△ 李晴望住肉片,不禁張開口。
△ 李浩將肉片送進李晴嘴裡。
李浩 : (高興) 晴兒!
△ 肉片在李晴口中,尚未咀嚼,李晴意識回來,把肉片吐在地上。
李浩 : (驚訝) 妳做咩啊?
李晴 :我喺唔會食……
△ 李浩立刻把肉片撿起,細心地把肉片清潔乾淨。
△ 李晴望著李浩對肉片的執著,對李浩失望,傷心難過。
李晴 :爹,肉對你來講真喺咁重要?
李浩 :妳講咩啊?只要有肉,我地就可以生存落去,無咗肉我地就會餓死,肉當然重要!
李晴 : (苦笑)……
第28場 外 山上 黃昏/晚
△ 張釗在等候李晴。手上拿著用布包著的鮮肉。
△ 張釗見李晴遲遲未到,心急地來來回回地行。
△ 天色轉暗,張釗仍未見到李晴出現,於是爬上高處觀望村莊。
△ 張釗發現村莊燈火通明,十分熱鬧,想起祭祀一事。
△ (Flashback) 張釗昨夜與李晴交談的畫面。
△ 張釗懷疑有事發生,於是起行趕落山。
第29場 外 村 接第28場 晚
△ 張釗潛入村莊,到處點著火把。
△ 村的空地中央架設了一個台,作集祭品和辦祭天儀式之用。
△ 村民正忙著搬運祭典要用的工具和祭品。
△ 張釗發現附近一間小屋守衛森嚴,發現徐剛過來想進入小屋。
守衛甲+乙:大公子。
徐剛 :嗯,入面情況如何?
守衛甲 :一切安好,但李姑娘依然唔肯食飯。
徐剛 :你地食咗飯未?
守衛甲+乙:未……
徐剛 :咁呢到交比我睇住得啦,你地去食飯先。我同晴兒由細玩到大有好多說話想同佢
講。
守衛乙 :咁好似唔喺幾好……?
徐剛 :得啦!你地去休息下先,唔好阻住我同晴兒相聚,我完咗再搵你地,你地去休息
下先!
守衛甲 :咁我地唔客氣啦!呢到就有勞大公子睇住!
△ 守衛甲拉住守衛乙離開。
△ 徐剛開心地入內。
△ 張釗亦悄悄地靠近小屋。
第30場 內/外 小屋 接第29場 晚
△ 李晴依然被綁在木頭上無法動彈。
△ 徐剛開門入內。
李晴 :喺你……?
徐剛 :做咩?好失望?咁又喺,我又唔喺妳嘅釗大哥,當然令妳好失望啦!只可惜,妳
過埋今晚就唔會再見到妳個釗大哥。
△ 徐剛走近李靜。
李晴 :你來就喺想咁?
徐剛 :晴兒啊,晴兒。
△ 徐剛用手摸李晴臉,李晴反感。
李晴 :停手啊!
徐剛 :妳睇下妳消瘦左幾多……妳知唔知以前嘅妳喺幾咁明艷照人?依家嘅妳喺幾咁墮
落可憐?妳知嘛,我由細到大都對妳一條心,想盡辦法咁逗妳開心,甚至乎我向
妳提親,但偏偏妳一直都拒絕我……
李晴 : (驚恐) 你究竟想點?
徐剛 :我只喺想懷念一下我一直朝思暮想嘅個個人啫……
李晴 :停手啊!
徐剛 :真喺可惜!咁靚嘅臉孔,聽日之後就再睇唔到……好可惜!好可惜!雖然阿爹幫
我訂左門親事,對方仲要喺全村最靚嘅馬珍,但喺偏偏比唔上妳……妳知唔知我
真喺好愛妳?既然妳聽日要獻比天神,暴殄天物,倒不如今日獻比我,咁仲好啦!
△ 徐剛強吻李晴,李晴不斷反抗。
李晴 :救……
△ 徐剛用布塞住李晴口。
徐剛 :想叫救命?無咁容易!
△ 張釗靠近小屋,走到門前偷看。
△ 張釗從門隙看見徐剛想污辱李晴,立即破門而入。
△ 徐剛聽見聲音轉身,被張釗一拳打倒。
李晴 : (哭著) 釗……大哥……
張釗 :晴兒……(望向徐剛,走過去捉起徐剛) 你個禽獸!(再一拳朝頭部打過去)
△ 徐剛痛苦的倒在地上動彈不得。
△ 張釗繼續向徐剛拳打腳踢。
李晴 :釗大哥,停手啊!
△ 張釗停手,轉而為李晴鬆綁。
△ 李晴倒入張釗懷中哭泣。
△ 張釗簡單地安撫了一下李晴,便扶起李晴。
張釗 :來(扶起李晴),我地要離開呢到!
第31場 外 村 接第30場 晚
△ 張釗帶著李晴小心地偷走。
△ 守衛甲乙食完飯回來,看見門打開了,立即入內,看見徐剛倒地不起,斷了氣息。
守衛甲+乙:大公子!
守衛乙 : (探氣息) 無咗氣息……
△ 守衛甲走出屋外敲響銅鑼。
第32場 外 村 接第31場 晚
△ 村長在巡視祭典準備的工作。
△ 銅鑼聲傳到,村長望向聲音傳來的方向。
△ 一手下急忙跑到村長面前。
手下甲 : 村長,大件事啦!大公子死咗!李晴走甩咗!
△ 村長驚訝了一下。
村長 : (高呼) 馬真!立即召集人馬追捕李晴!你先出發,我隨後到!(向手下甲) 帶我
去剛兒到……
△ 村長、其隨從和手下甲一同前往徐剛所在地。
第33場 外 村 接第32場 晚
△ 村內銅鑼聲不絕,村長手下分成各個小隊,有步行的,有騎馬的,向四周出發搜捕李晴。
△ 張釗和李晴躲在暗角處,躲避遠處過來的追兵,等待時機離開。
△ 追兵走過,張釗和李晴隨即離開。
△ 離開時被追兵回頭發現,隨即敲銅鑼大聲通傳。
追兵甲 : (敲銅鑼) (大聲) 發現李晴!仲有張釗!喺呢邊!佢地向著山上走啊!
△ 各處的追兵聽見傳令,立即向張釗李晴所在的方向移動。
第34場 內 小屋 接第33場 晚
△ 村長和眾隨從趕到徐剛死的小屋,看見徐剛的屍體臉露傷心。
村長 : (傷心) 剛兒……
△ 此時傳來李晴和張釗的消息。
手下甲 :村長,發現咗李晴啦!張釗同佢一齊!
村長 :張釗……?(憤怒) 一定係佢殺死我剛兒!同我傳令落去殺無赦,邊個拎佢人頭
來見我嘅,我重重有賞,免佢三年稅收,賜佢一年份嘅肉,仲有白米,銀兩!仲
有李晴呢個賤丫頭,盡可能同我活捉,生捉唔到都要見全屍!通傳所有村民,要
佢地都幫手捉人,任何人捉到佢地都一律有賞!
手下甲 :係!
△ 手下甲急步離開。
村長 : (向守衛甲乙) 你地帶我剛兒回家安置! (向隨從) 備馬!
第35場 外 村 接第34場 晚
△ 村民收到村長追捕李晴的通告,紛紛拿起可用武器和火把參與追捕張釗李晴的行動。
袁光 :只要捉到佢地,就可以免稅、有肉食!(分發火把給陸信、吳東)
陸信 :肉……我想要肉……(拿起收割的鐮刀)
吳東 :肉係屬於我!(拿起柴刀)
△ 眾村民紛紛跟著村長的大隊出發,往山上追捕。
眾村民 :肉……肉……(口中不斷碎碎念)
△ 村民趕急出發時把火把撞跌,卻無人理會。
△ 火勢逐漸蔓延。
第36場 外 森林 接第35場 晚
△ 張釗帶著李晴在黑暗的森林中逃跑。
△ 馬真帶領的騎兵從後追趕過來。
馬真 :張釗、李晴!你地走唔甩架啦!(指揮追兵) 呢邊!
△ 張釗利用樹林的地形,盡量地拉開與騎兵的距離。
張釗 :呢邊!
李晴 : (喘氣) 釗大哥,唔得啦……我走唔到啦……
張釗 :晴兒,堅持住啊!我地一定走得甩架!
△ 村民的大隊亦隨後趕到,向著張釗圍上去。
△ 張釗帶著李晴走入小徑,利用森林的分叉地形,稍微擺脫了追捕。
馬真 :騎兵隊抄佢前路!其他人分頭追捕!
△ 騎兵隊向另一方向走。
△ 李晴跌倒在地。
張釗 :晴兒妳點啊?
李晴 :釗大哥……你一個走啦……我已經走唔到,我只會拖累你……
張釗 : (嘗試拉起李晴) 我唔會掉低你一個!來啊,只要過左橋就得架啦。
△ 一小隊村民部隊趕到,將張釗包圍。
村民甲 : (想大聲叫) 發現……
村民乙 : (掩村民甲口) 傻咗咩?村長有令只要拎到張釗人頭就重重有賞,你叫人過來,
咪即係將呢舊肥肉送比人?
村民丙 :無錯!我地五個人自己分,總好過讓比其他人。
△ 張釗拿出狩獵時用的小刀,小心地做防衛。
△ 村民打了眼色,數著三,二,一,然後一齊向張釗襲擊。
△ 村民人多,張釗不敵,身體各處被斬傷,終於不支倒地。
△ 村民的眼神更加銳利,衝上前給張釗最後一擊,終於將張釗的頭割了下來,頭跌在地上滾了兩滾。
△ 坐在一旁的李晴已被驚嚇到不懂反應。
△ 村民仍未鬆懈,各自拿著武器對峙。
村民甲 :個人頭喺我割架!
村民乙 :喺我插咗佢心臟一刀致命架!
△ 每個村民各自堅持人頭是屬於他們自己。
△ 爭議幾句以後便各自各相殘殺起來,手中火把掉落地上,燒著野草和枯枝,火勢蔓延。
第37場 外 村 接第36場 晚
△ 村莊的火勢不斷蔓延,村民準備的祭壇、祭品通通燒著了。
△ 附近的屋亦燒起上來,火勢迅速蔓延。
△ 剩低的村民無力救火,紛紛走難。
△ 李浩的家亦燒著了。
△ 李浩趕到家前,發現屋已燒著無法入內。
李浩 : (傷心) 無啦無啦……村長比嘅錢無啦……錢又無咗,家又無咗,連晴兒都走
埋……我咩都無啦……
第38場 外 村長家 午
△ 樹林燒毀了。
△ 房屋燒毀了。
△ 飢餓無力的村民在燒毀了的房屋前攤坐,等待死亡。
△ 小山丘上的村長家完好無缺。一支車隊在門前準備。
△ 村長命令親信收拾物資上車。
村長 : 記得點齊數!一件都唔好漏!
△ 一班村民來到村長門前。
陸信 : 村長……你好心帶埋我地走啦!(跪低)
△ 其他村民亦跟著跪低。
村長 : (吩咐下人) 趕佢地走!
△ 下人們將村民拉起,趕走他們。
村長 :一班下賤嘅賤民!
△ 村長指示車隊離開。
第39場 外 村 昏
△ 黃昏、陰暗的天空。
△ 枯樹,上面有一班烏鴉群。
△ 殘殘破破的屋,門前坐著一家人,一副將死的樣子。
△ 李浩坐在燒毀了的家前。
李浩 : (望著樹上的烏鴉) ……肉……肉……
△ 李浩失去意識。
△ 附近的村民看到李浩倒下。
村民甲 :死……肉……肉……肉?
村民乙 :肉……
△ 附近的村民慢慢向李浩擁過來。
△ 烏鴉叫。
△ 天色轉黑。
-完-
留言列表